مساء الخير .. ومساء النور.. ومساء مايليق الا فيكم ...
بدون مقدمات اليوم موضوعي يتعلق بـ انتقام طقاقه " والسبب بتعرفونه في نهاية الموضوع ..
..ومايخفى عليكم مدى الارباح اللتي تجنيها الطقاقه ..
] مدخل [
كلوا نفر زين زين .. كلوا نفر يركب خيل
عدد من الحريم لاباس به كانوا متجمعات بالمجلس امي ..حيث استوقفتني سوالف الطقاقات واخر تطوراتهن في الزواجات .. حيث اصبحن ينافسون المعازيم بلبسهن
حدثتنا احداهن " ام راكان " قصة احدى الطقاقات وهي قصه واقعيه .. صارت في قصر افراح ولايخفى عليكم اهمية الطقاقات في العرس ..
تقول دخلت وحده من الطقاقات الى دورة المياه ( الله يكرمكم ) للتتزين وتتكشخ ولكنها سنترت امام المرآه وكانها العروس وبتنزف ..
كانت دورة المياه متشبعه من الحريم اللاتي واقفات مسنترات امام المرآه ويتئملون بفيساتهن ..مالكم بالطويله كانت وحده من الحريم تدعي بام صالح تتزين بجانب تلك ( الطقاقه )
وهمست بصوت منخفض محدثه صديقتها .. ( شوفي طقاقه آخر زمن .. حمدلله والشكر أجل تكرونيه وتتزين ! ) .. <--- مهوب انا اللي اقوله ذي ام صالح
كانت الطامه في ذاك الوقت ان سمعتها الطقاقه بإذنيها الاثنتين ..بس انها خرجت من الحمام ولم تبوح بشيء .. الى ان وصلت للمنصه اللتي يجلسون عليها الطقاقات في احدى زواياها للطق والردح
.. المعازيم اكتملوا . . والجميع ينتظر الطق . . ! ولكن اين الطق ! جت ام العروس تآمر الطقاقه وتوبخها لتأخرها بالطق فوقفت الطقاقه بنص المنصه وبصوت عالي تقول ::
شوفوا انا ماراح اطق الا اذا جت فلانه واعتذرت لي وتاسفت مني قدام الجميع ..!
بدى السكوت يعم الحريم وبدت العيون تتصافق وبدى الحش يعم المكان وكلن يقول بصوت خافت .. منهي .. منهي ! ..
حاولت فيها ام العروسه بقولها :: ( ياطقاقه يابنت حلال تعوذي من الشر ولايصير مزاجك مزاج عبد لاتخربين عرس بنتي الوحيده خلي الليله تعدي على خير )
الطقاقه :: حشى والله مااطق الا اذا جت واعتذرت مني هالدبا الملسونه !
حاولوا الحريم باقناع ام صالح للاعتذار من الطقاقه .. ولكنها ابت بزعم ان برستيجها لايسمح لها بالاعتذار من طقاقه ..قائله :: تاكل تبن .. هذا اللي ناقص اعتذر من طقاقه !
الطقاقه :: حشى والله مااطق الا اذا جت واعتذرت مني هالملسونه !..
ويمين ويسار ويالله ياام صالح كلها كلمة اسفه وانتهينا ..يمين يسار .. شمال تحت .. واخيرا طاح اللي براسها ووافقت بان تعتذر للطقاقه .. فتوجهت نحو المنصه وقالت لها وهي تطقطق العلك في فمها ..(انا اعتذر) ..
الطقاقه :: واللي يعتذر مايمد يده يسلم يابنت الاصول !
ام صالح :: لاوالله نسلم .. ومدت يدها للسلام .. وماكان من الطقاقه الا ان تاخذ بيد ام صالح وتلفها بقوه وتحط وجهها بالجمر اللي يسخنون فيه طيرانهم ويتشوه وجهها ..
انقلب الفرح لــ حزن .. واللي تصايح على ام صالح واللي تهاوش واللي . . . وبدل ان تكون ليله ورديه رومانسيه يغمرها بهجه وسرور.. انقلبت ليله سوداء مليئه بحزن على وجه ام صالح الذي تشوه .. كان سببه زلة لسان ! !
[ لسانك حصانك ان صنته صانك وان خنته خانك ] ..
قبل المخرج شاركنا برايك :
س1: من المخطيء "ام صالح " ام الطقاقه ؟ <--- غيري السؤال
س2:مارايك في انتقام الطقاقه من ام صالح وهل كانت ردة الفعل من الطقاقه طبيعيه كونها "طقاقه "؟
س3 :هل انت/ي نسخه من ام صالح في طواله اللسان كونك تقطين الكلام قدام كل من هب ودب ( فضيحه ) خخخخخخخخخخخخخ واذا الجواب بنعم عطونا الدليل بموقف صار لك وتورطت ؟
] مخرج [
كان نفر كلوا زين زين .. واحد نفر خانه لسانه حيل حيل
<--- لاحظ عزيزي القارئ/ه انه على وزن المدخل وهذا يدل اني شاعره
* اتمنى اني ماطولت عليكم بهذرتي لكن مثل مانتوا عارفين كوني انتمي لفئة الحريم فالهذره لابد منها
+ القصه من الواقع
موضوع: أم صالح سرت ليلها وهل الدمع من عينها <- - - - - يوجد طق بالداخل ! 
